Twornju TDDK w Nadróznej Hrabowce zaměrnje dale rozšěrjeja

Nadrózna Hrabowka (SN/BŠe). Twornja TDDK za němske klimowe kompresory w Nadróznej Hrabowce so zaměrnje dale wuwiwa. „Hladajo na šesty twarski wotrězk wšitko po planje běži“, wjeseleše so prezident TDDK Yoichi Terao minjeny pjatk na zběhance. Hačrunjež dyrbjachu w zymje wjedra dla dźěła na twarnišću přetorhnyć, swjećachu jenož dźesać měsacow po prěnim zarywje wažnu mjezykročel – zběhanku. Cyłkownje 70 dźěłaćerjow pod hłownym nawodom japanskeho twarskeho koncerna Takenaka so prócuje naprawu zwoprawdźić. „Na papjerje najprjedy wšitko mjeńše skutkuje, tola na městnje so dimensije twara wotbłyšćuja“, Terao zwurazni. Wón je nadźijepołny, zo je stejnišćo za přichod derje přihotowane. W septembrje 2022 su zamołwići twornje připowědźili, zo chcedźa dołhodobnje elektriske kompresory, leće a mašinelne wobdźěłanje aluminijowych wobtwarkow zhusćaka w stejnišću produkować. Jenož dźewjeć měsacow pozdźišo, loni w juniju bě prěni zaryw na twarnišću. Zmóžniło je tole twarski zarjad Budyskeho wokrjesa.