Film „Pola nas rěka wona Hanka“ wotnětka w kinach Němskeje

Budyšin (SN/bn). „Je nam wulka česć a wjeselo, premjeru filma ‚Bei uns heißt sie Hanka – Pla nas gronje jej Hanka – Pola nas rěka wona Hanka‘ w našim domje wuhotować směć.“ Z tymle słowami powita nawodnica Budyskeho Filmoweho palasta Sibylle Schramm wčera hosći prěnjeho regularneho předstajenja paska, kotryž pokazaja wotnětka w kinach po cyłej Němskej. Cosima Stracke-Nawka ze serbsko-němskeje syće Łužycafilm dźakowaše so jej a jeje mustwu „za nastork a wulku prócu, premjeru w Budyšinje zwoprawdźić“.