Marketingowu towaršnosć chcedźa do noweho zwjazka přerjadować

Wochozy (AK/SN). Turistiske zwičnjenje Hornjeje Łužicy dyrbi zaměrniše a skutkowniše być. Po móžnosći hižo klětu dyrbi nowozałoženy přesahowacy turistiski zwjazk Hornja Łužica kmany być jednać. „Chcemy aktualne struktury Marketingoweje towaršnosće Hornja Łužica-Delnja Šleska (MGO) do noweho zwjazka přerjadować“, podšmórny Budyski krajny rada Udo Witschas (CDU) na wčerawšej nowinarskej konferency we Wochozach, hdźež su zamołwići turistiske wuwiće w Hornjej Łužicy bilancowali.