Domowina wurisanje wo „Myto za hospodarstwo“ zahajiła
Budyšin (SN/BŠe). Zwjazk Łužiskich Serbow Domowina je wčera serbske wubědźowanje wo „Myto za hospodarstwo“ zahajiło. „Serbska rěč w předewzaćach steji w srjedźišću wubědźowanja“, wuzběhny městopředsyda Domowiny dr. Hartmut Leipner na rozmołwje z nowinarjemi. Wón je zdobom předsyda wuběrka za hospodarstwo, kotryž je minjene lěta myto iniciěrował. „Zaměr myta je, zo je rěč po cyłym zjawnym žiwjenju widźomna a so tam wužiwa. Žiwa dwurěčnosć je dźěl strategije za wuwiće rěčow“, dr. Hartmut Leipner podšmórny. Wón zhladuje při tym zdobom na zaměr 100 000 serbowacych w lěće 2100. Łužica ma so jako žiwy region z tradicijemi wotbłyšćować. Na serbske tradicije dyrbi „Myto za hospodarstwo“ nawjazać. Dale a wjac ludźi so do Łužicy nawróći. Swoju zwjazanosć z domiznu móža tež w předewzaćach nańć, hdźež so serbšćina wužiwa.
