W bywšej Janšojskej brunicowej jamje chcedźa dale milinu produkować

Janšojce (AK/SN). Brunicowy a energijowy koncern LEAG chce w Janšojskej wuhlowej jamje, kotruž su kónc lěta 2023 zawrěli, mnohostronsce energiju produkować a składować. Naprawy su dźěl cyłkowneho projekta GigawattFactory. Tole wuzběhny jednaćel wobłuka wobnowjomne energije Dominique Guillou wčera w Janšojcach. „Jeničce w bywšej brunicowej jamje Janšojce je potencial za dwaj gigawattaj miliny. To wotpowěduje energiji, kotrež zamóžetej dwě atomowej milinarni produkować“, wón wuswětli. Ćežišća naprawow za to su wětrnikowy park Baršć-Rjasnik II, fotowoltaikowa připrawa na deponiji Janšojce I, přichodnje fotowoltaikowy park Bórow (Bohrau), fabrika za składowanje miliny Big Battery w Mósće (Heinersbrück) a tři přepinarnje za přetworjenje miliny. Zdobom nastawaja na přestrjeni bywšeje brunicoweje jamy płoniny za ratarstwo a lěsnistwo, kaž tež pohórnistwowe wodźizny Móstowski jězor, Janšojski jězor a Hołbinski jězor.