Terminy za „Pózdnju změnu“ w Budyskim wokrjesu sej hižo zapisać

Budyšin (SN/BŠe). Format „Pózdnja změna“ w Budyšinje stajnje wulki zajim budźi. Mjeztym chcedźa organizatorojo zarjadowanje lětsa hižo wosmy raz w sprjewinym měsće přewjesć. „Pózdnja změna“ skići mjenujcy jónkrótnu składnosć za wrota zawodow pohladać, hdźež ludźo hewak žadyn přistup nimaja. Předewzaća pak maja zdobom šansu, wo fachowcow wabić abo pola młodych ludźi zajim budźić, kotřiž móhli wukubłanje w zawodźe zahajić.

Z busom jědu zajimcy wot zawoda k zawodej, hdźež jim mějićeljo abo sobudźěłaćerjo dohlad do swojich činitosćow sposrědkuja. Za wotpowědne busowe tury maja so ludźo wězo do toho přizjewić, tak zo je koordinacija móžna.