Minister Breitenbuch namołwja ludźi, wodu lutować

Łužica (mh/BŠe/SN). Na juhu Braniborskeje a na zapadźe Łužiskich horinow njeje so wot februara hižo dosć dešćowało. Poměrnje włóžny start do junija z wjele spadkami pak suchoće wotpomhał njeje. Sprjewja a Čorny Halštrow we Łužicy hižo dosć wody nimatej.

Braniborski krajny zarjad za wobswět (LfU) je tohodla přikazał, zo dyrbi Grodkowska rěčna zawěra hižo nětko wodu do Sprjewje wotedać. Čorny Halštrow pak wobstajnje wodu z basenka w Nimješku (Niemtsch/Złokomorowski jězor) dóstawa. To rěčnik wobswětoweho ministerstwa w Podstupimje Matthias Bruk wobkrući. Spaduje-li pegel přehłuboko, je wěstota nasypow w brunicowej jamje wohrožena.

Spadki na juhu Braniborskeje běchu jasnje pod dołholětnym přerězkom. Při Sprjewi w Choćebuzu su meteorologojo wot januara hač do meje jeničce 127 milimetrow spadkow měrili. To je jenož něhdźe 60 procentow wočakowanych spadkow.