Lěsny woheń w Gohrischskej holi na sewjeru­ Mišnjanskeho wokrjesa je najwjetši­ w Sakskej minjenych 30 lět. Hladajo na lěto a stupace temperatury změny klimy dla, je škit lěsow před wohenjom­ wulke wužadanje.

Zo so hola wokoło Gohrischa na braniborsko-sakskej mjezy pali, njejsmy jenož pola nas, w něhdźe 100 km zdalenej Hornjej Łužicy, minjeny tydźeń čuli. Samo hač do Berlina běchu wětry kur wulkeho lěsneho wohenja donjesli. Wosebite wužadanje při hašenskich dźěłach wšak běše stara municija, kotraž na něhdyšim wojerskim zwučowanišću přeco hišće we zemi je. Móžnych rozbuchnjenjow dla smědźachu so wohnjowoborne awta a hašenske helikoptery jenož kilometer wohenjej bližić. Tež tohodla su tam hašenske­ robotery z Braniborskeje zasadźili.