Krótkodobnje zawrjena železniska čara chaos zawinowała

Budyšin (SN/BŠe). Wospjet je na železniskej čarje RB65 mjez Choćebuzom, Grodkom, Běłej Wodu, Zhorjelcom a Žitawu k haćenjam dóšło. Kaž Wuchodoněmska železnica (ODEG) zawčerawšim zdźěli, je to wobhospodar infrastruktury Němskeje železnicy (DB) InfraGo krótkodobnje připowědźił. „Krótkodobnosć twarskeje naprawy je na škodu našich sobujěducych we Łužicy a haći zawodne wotběhi. To njeje za sobujěducych a ODEG dlěje akceptabelne“, zwurazni jednaćel Wuchodoněmskeje železnicy Lars Gehrke. Kritika měri so cyle jasnje na wobhospodarja DB InfraGO. „Jako železniske wobchadne předewzaće smy wot fungowaceje a wužiwajomneje infrastruktury wotwisni, kotraž tuchwilu w dosahacej měrje k dispoziciji njeje. Tuž njeje nam móžno, swoje zrěčenja spjelnić“, z wotmołwy na naprašowanja na ODEG wuchadźa.