Prěni raz přerězna podruž za studowacych mjezu 500 eurow docpěła

Budyšin (SN/lcm). Hdyž su zbožo a kontakty klučik za twoje bydlenje, njeje něšto w porjadku. Štóž lětsa swój studij zahaji, znaje problem. Nawěški bydlenjow maš hodźiny dołho a to dźeń wote dnja přehladać. Bjezkónčnje požadanja na zhromadne bydlenja rozpósćeleš a so nadźiješ, zo scyła něchtó na naprašowanja wotmołwi? Haj, to je zrudna realita. Hilžbjeta Pöplec zahaji lětsa swój studij w Lipsku. „Wot 25 požadanjow na WG-stwu sym pjeć wotmołwy dóstała.“ Dwaj z tutych běštej přeprošenje na WG-casting. Cyłkownje móžeš rjec, zo je namakanje bydlenja dołhi a z wjele zbožom zwisowacy proces. Tak tež Konječan Antonius Wjeńka rozprawja: „Smy po něhdźe dwěmaj měsacomaj pytanja bydlenje ze zbožom a připada dla namakali. Je jara ćežko, zapłaćomne bydlenje namakać.“