Hrodźišćo pola Bronja zbudźa zajim archeologow

Bronjo (SN/BŠe). Po cyłej Hornjej Łužicy fachowcy wobstajnje pomniki wobkedźbuja. Tele dny so archeologojo wosebitemu pomnikej wěnuja, mjenujcy hrodźišću w Bronju. Při tym jedna so wo projekt Interreg Pólska-Sakska 2021–2027 z mjenom „Fragilne namrěwstwo“. W nim wědomostnicy wěste archeologiske pomniki w zwisku z pódu ze wšelakimi metodami přepytuja, zo bychu zwěsćili, kak so změna klimy na pomniki wuskutkuje. Z dopóznaćow wotwodźuja potom naprawy za zachowanje zemskich pomnikow.