Předewzaćeljo a posłužbowarjo na hospodarskim forumje so wuměnili

Čorny Chołmc (SN/BŠe). Jednaćel Čornochołmčanskeho Krabatoweho młyna Anton Fuchs je wčera něhdźe 65 ludźi na mjeztym třeći Serbski hospodarski forum witał. Předewšěm dźěše tónkróć wo hospodarski wobłuk turizma. „Dźiwamy stajnje na to, zo smy awtentiscy, štož je hladajo na turizm wužadanje“, Fuchs wuzběhny. Wčerawše zarjadowanje měješe zdobom móžnosće pokazać, kak so serbska rěč w předewzaćach zapřijeć hodźi. „Hódnotu dwurěčnosće měli sej tež w hospodarstwje wuwědomić a zachować“, předsyda Domowiny Dawid Statnik na zahajenju foruma wuzběhny.