Wokrjesna nalutowarnja ludźi nětko tež online poradźuje

Budyšin (SN/MiP). Budyska wokrjesna nalutowarnja je swój serwis rozšěriła: Wot oktobra móža so jeje klienća doma před ličakom sedźo we widejo-terminje cyle přijomnje online wot fachowcow banki poradźować dać. Z tym chce finančny institut lěpje nowym narokam ludźi wotpowědować, „kotřiž wočakuja moderne serwisowe poskitki, bjez toho zo dyrbja so wosobinskeho poradźowanja wzdać“, praji nawoda předsydstwa Dirk Albers njedawno w nowinskej zdźělence. Zdobom wón na to skedźbni, zo njeje widejo-poradźowanje naprawa, z kotrejž chcyli zamołwići klasiske poradźowanje w filiali redukować abo wotstronić. „Město toho ma poskitk serwis w syći našich filialow dołhodobnje wudospołnjeć“, Albers­ wuzběhnje. Tuchwilu ma Budyska wokrjesna nalutowarnja 34 filialow a stejnišćow za samoposłužowanje kaž tež nimale 300 sobudźěłaćerjow.