Lěwicarskeje akcije dla tysacy Berlinjanow hižo štwórty dźeń zymu mrěja

Berlin (SN/MiP). Hakle loni w septembrje su Berlinjenjo w 43 000 domjacnosćach na juhowuchodźe města poł dnja bjez miliny wuńć dyrbjeli. Zašłu sobotu milina w němskej stolicy znowa wupadny, tónraz w juhozapadnych měšćanskich štwórćach Nikolassee, Wannsee, Zehlendorf a Lichterfelde. Wot spočatnje 45 000 potrjechenych domjacnosćow tuchwilu něhdźe 30 000 přeco hišće žanu milinu nima. Dospołnje budźe škoda prawdźepodobnje hakle štwórtk wotstronjena, Berlinski wyši měšćanosta Kai Wegener (CDU) wčera w nowinskej zdźělence wozjewi.

Teroristiski nadpad na milinowu infrastrukturu města bě lětsa – kaž hižo loni – přičina za přetorhnjene zastaranje z milinu. W septembrje běše lěwa aktiwistiska skupina dwaj milinowej sćežoraj wobškodźiła a so k nadpadej wuznała. Akcija měrješe so přećiwo předewzaćam „wojersko-industrielneho kompleksa“, kotrež maja w Technologijowym parku Adlershof, jednym z najwjetšich w Němskej, swoje sydło. Skućićelow hač do dźensnišeho našli njejsu.