Wabja wo akceptancu ludźi za produkciju brónjow a prezencu wójska

Drježdźany/Podstupim (SN/mb). Změnu strukturow Łužicy chcetaj ministerskaj prezidentaj Sakskeje a Braniborskeje, Michael Kretschmer (CDU) a Dietmar Woidke (SPD), tež za to wužiwać, zo byštaj krajej sylnišo ke kmanosći Němskeje so wojersce zakitować přinošowałoj. To wobkrućištaj w rozmołwje „Lausitz Magazin“. Aktualne wudaće časopisa wěnuje so wuskutkam „přewróta časa“ za hospodarske wuwiće našeho regiona. Z tutym zapřijećom bě bywši zwjazkowy kancler Olaf Scholz kónc februara 2022 napad Ruskeje na Ukrainu wopisał. Wone wopřija tež sto miliardow eurow „wosebiteho zamóženstwa za zwjazkowu woboru“, kotrež Němska po woli wjetšiny zwjazkoweho sejma z kreditami financuje.