W Budyskim wokrjesu maja ludźo najmjenje po wšej Sakskej płaćić

Drježdźany. (SN/MiP/jp). Sakski krajny zarjad za statistiku je w lěće 2025 wuslědźił, zo domjacnosć ze štyrjomi wosobami w Kamjenicy wob lěto přerěznje 588 eurow wjac za pitnu wodu a wopłóčki płaći hač ludźo w Budyskim wokrjesu. Štyriwosobowa mustrowa domjacnosć w Sakskej je w lěće 2025 po podaćach statistikarjow za pitnu wodu přerěznje 500,98 eurow a za wopłóčki 648,01 eurow zapłaćiła. W Budyskim wokrjesu wobydlerjo přerěznje najmjenje płaća: Něhdźe 976 eurow mustrowa domjacnosć ze štyrjomi wosobami tu wob lěto za pitnu wodu a wopłóčki nałožuje. Z wotstawkom najwyše su wudawki za to w Kamjenicy. Tam dyrbja něhdźe 1564 eurow zwjesć. W Drježdźanach płaća přerěznje 1127 eurow a w najwjetšim měsće Sakskeje, Lipsku, 1196 eurow.