Zwjazanosć wobydlerjow gmejny Hornja Hórka ze „swojej“ twornju tež dźensa hišće wulka

Tajkile hołk a tołk hale Dźěžnikečanskeje twornje syčomłóćawow a ratarskich mašinow dołho wjace dožiwili njejsu! W lěće 2016 běchu tu poslednje neonowe swěcy hasnyli. Před nimale dwěmaj tydźenjomaj, sobotu, 2. meje, pak so tu z ludźimi mjerwješe. Składnostnje 75. róčnicy załoženja twornje „Postup“ běše gmejna Hornja Hórka zhromadnje z tamnišim wjesnym klubom na jubilejny swjedźeń přeprosyła.

Hladajo na něhdźe 600 hosći na dworje při něhdyšim zarjadniskim twarjenju zawoda zwěsći wjesnjanosta Thomas Polpitz (CDU) w swojej witanskej narěči, zo drje je w gmejnje lědma domjacnosće, z kotrejež njeby znajmjeńša jedyn swójbny w tworni dźěłał. „Wulka ličba wopytowarjow wotbłyšćuje wuznam, kotryž je zawod něhdy měł a kotryž hač do dźensnišeho saha“, wón podšmórny.