Budyšin (SN/MiR). We wobłuku 23. Nysoweho filmoweho festiwala wuhotuje serbsko-němska syć Łužycafilm swoje nalětnje zetkanje. Dźensa su w rumnosćach towarstwa Dźěłan dźeń na Budyskej Sukelnskej z dźěłarničku pod hesłom „Film-dźiwadło, dźiwadło-film – jedyn puć k serbskemu filmej?“ zahajili. Čłonka syće a moderatorka dźěłarnički Cosima Stracke-Nawka hladajo na program rozłoži, zo „so za tym prašamy, kotre perspektiwy serbski film ma. Kotru rólu hraje přichodnje kumštna inteligenca při zwobraznjenju idejow, kotrež su kreatiwni wuwili? Prěni film ze serbskej temu, kotryž je z pomocu KI nastał, dźě hižo dźensa w Kamjentnym domje předstajimy.“ Ćežišćo workshopa twori rozestajenje wo tym, kak je móžno, nowe temy za jewišćo namakać, kak hodźeli so tworić a kotry potencial w nich tči. Mjez wočakowanymi wobdźělnikami je režiserka a awtorka dźiwadłowych hrow Esther Undisz, kotraž chce z dalšimi entuziastam serbskeho filma na prašenja wotmołwić. Jutře, 30. meje, pokročuje zetkanje w Zhorjelcu, mjez druhim z dźěłarničku „Projekty, plany a programy“.