Budyšin. Tež lětsa so zaso wosebity filmowy camp w Hornjej Łužicy wotměje, a to wot 26. do 30. awgusta, Marketingowa towaršnosć Hornja Łužica-Delnja Šleska nětko zdźěli. Premjera projekta bě loni dosć wuspěšna. Na to chcedźa zamołwići nawjazać. Što je wobsah projekta? Na „ClipQuest.Lausitz 2026“ pod hesłom „Změna perspektiwy. Najlěpše stawizny nastawaja mjeztym“ zetkaja so młodźi filmowcy a zajimcy, zo bychu pjeć dnjow z nazhonitymi mentorami filmoweje branše dźěłali. W třoch skupinach produkuja młodźi kreatiwni krótke filmy. Tute jednaja wo ludźoch, městnach a idejach Hornjeje Łužicy. Projektowa nawodnica Darleen Nebelung: „Lońše filmy zawostajichu jara dobry zaćišć, tež hladajo na to, kotre perspektiwy młodźi filmowcy na Łužicu maja. Nas zajimuje přirodny wid na region, a chcemy widźeć, kajke stawizny młodostni we Łužicy wotkrywaja.“