Budyšin (SN). Dobyćerjo idejoweho wubědźowanja „Zhromadnje perspektiwy tworić – My, Łužica a DZA“ su postajeni. Přichodny tydźeń srjedu je mytowanske zarjadowanje na campusu Astrocentruma Łužica w Zhorjelcu. Z wjace hač 40 zapodatych namjetow je jury fachowcow dwanaće projektow wuzwoliła, kotrež na kreatiwne wašnje wědomosć a slědźenje z kubłanjom, kulturu a towaršnostnym angažementom zwjazuja. Projekty budu akterojo na zarjadowanju prěni króć zjawnosći předstajić. Dohromady bu pjeć idejow w kategoriji „DZA zwjazuje ludźi“, tři projekty w „DZA skutkuje na městnje“ kaž tež štyri předewzaća w kategoriji „DZA twori perspektiwy“ wuzwolenych. Planowane je, zo maja so wone w Zhorjelskim a Budyskim wokrjesu zwoprawdźić.