Najwjetša kumštna jězorina Europy bytostny měznik wuwića docpěła

Lejno. (SN/jp) Historiski wokomik dožiwichu wčera wopytowarjo Łužiskeje jězoriny. W tamnišej kónčinje běchu dalše tři kanale wotewrili, tak zo je nětko cyła jězorina mjez sobu zwjazana a na přikład čołmikowanje po jězorinje bjez haćenjow móžne. Štož běše něhdy són mnohich lubowarjow wodoweho sporta abo dowola z čołmom, je z tym realita.

Přez zwjazanje wšitkich jězorow z wuwzaćom Bjerwałdskeho jězora, kotryž so zdalenosće dla přizamknyć njehodźi, je so tež poskitk za dowolnikow a lubowarjow sporta w a na wodźe rozšěrił. Z kanalemi su nětko tež Parcowski, Sedlišćanski a Rański jězor zwjazane. Tuž móža so ludźo na najwšelakoriše wulěty na wodźe podać a so po puću přeco zaso kupać.