Łužiska jězorina je po cyłej Němskej přikład za změnu strukturow. To je jenož móžno, dokelž potrjechene komuny derje hromadźe dźěłaja. Tole podšmórny bywša krajna radźićelka a předsydka Zaměroweho zwjazka Łužiska jězorina Sakska Petra Kockert njedawno na zarjadowanju składnostnje 30lětneho wobstaća zwjazka.

Lejno (AK/SN). „Sam za sebje mało docpěješ. Zhromadnje móžemy něšto wulke zeskutkownić“, Kockert podšmórny. Tójšto zastupjerjow komunow, zwjazkow, zarjadow a zarjadnistwow so na zarjadowanju wobdźěli. Program wopřijimaše mjez druhim přednošk „30 lět změnu we Łužiskej jězorinje wuhotować – staw a perspektiwy“ jednaćela zaměroweho zwjazka Daniel Just a hudźbne wobrubjenje chóra Seebären ze Złeho Komorowa.