Prěni raz wuhotowany L/Ost poetry festiwal w Choćebuzu z mjezynarodnej měšeńcu lyriki, tworjaceho wuměłstwa a hudźby

Poetiskim hłosam z wuchoda Němskeje a z Europy jewišćo skićić a rěčane słowo, literaturu, hudźbu a wuměłstwo zwjazać – wo a za wšo to postara so prěni L/Ost poetry festiwal, kotryž wotmě so wot 16. do 18. julija w Choćebuskej Starej płachtarni blisko Błótowskeho dwórnišća. Pólscy, čěscy, belgiscy, ukrainscy a madźarscy wuměłcy su runje tak wo swojej wuchodnej identiće rěčeli, rappowali abo spěwali kaž młodźi poeća z (přeco hišće často tak mjenowanych) nowych zwjazkowych krajow a z regiona. Mjez nimi běštaj tež Serbaj Měto Kjarcmaŕ z Choćebuza a Jonas Pjetaš z Pančic-Kukowa, organizatorka Jessy James LaFleur, mjeztym hižo dołho we Łužicy aktiwna přisłušnica němskeje mjeńšiny na wuchodźe Belgiskeje kaž tež lokalnaj matadoraj Lesebühne Cottbus a Choćebuski kjarcmarski chór. Wuhotowałoj stej zarjadowanje Spoken word akademija a ukrainska iniciatiwa Sklad čo. 5 zhromadnje z mnohimi dalšimi partnerami.