Nowy wirus tež łužiskich plahowarjow howjadow znjeměrnja

Radwor/Hrańca (SN/StŠ). Jako spočatk tydźenja sakske ministerstwo za strowotnistwo wozjewi, zo je nowy wirus z mjenom shamonda nětko tež w Sakskej dopokazany, to łužiscy plahowarjo howjadow hižo dawno wědźachu. „Tajke něšto so pola nas mjez ratarjemi wězo spěšnišo šěri hač přez oficialne kanale. Wězo smy tež jako zawod pismo dóstali, zo bu wirus pola kruwow w ratarskim zawodźe w Vogtlandźe dopokazany“, tak Stefan Triebs, nawoda Radworskeho agrarneho drustwa.