Horcota a suchota tež łužiskich hatarjow poćežujetej

Rěčicy (SN/CeK). Wjele sakskich rybarjow ma přiběraceje horcoty a suchoty dla tuchwilu starosće. W mnohich hatach z rybami je staw wody niski, zdźěla su wodźizny samo dospołnje wusušene. Wosebje w sewjernej, srjedźnej a wuchodnej Sakskej su zawody sylnje potrjechene, potajkim tež we Łužicy. Jako katastrofalnu wopisa hatar Armin Kittner z Hóznicy situaciju lětsa. Na dalše naprašowanja Serbskich Nowin njejsu hatarstwa z regiona bohužel reagowali. Po informacijach Krajneho rybarskeho zwjazka su hižo wjacore tony karpow zahinyli. Zo bychu dalšim stratam zadźěwali, spytaja hatarjo, swoje ryby mjez druhim z dodawanjom kislika a z přewětrjenskej techniku podpěrować. Za to zatwarja do hatow klumpy, kotrež kislik do wody dawaja. Nimo toho přewjeduja hatarjo tež nuzowe wułójenja. Po móžnosći ryby do hłubšich hatow přesadźa. Tež jich kapacity pak su wobmjezowane, a na mnohich městnach woda njedosaha, zo bychu zwěrjata zastarane byli. Wosebje problematiske su wysoke temperatury wody.