Frankfurt n. M. (cyna/SN). „Die Seele des Nebels“ rěka zběrka poezije, kotraž je lětsa w Heidelbergskim nakładnistwje Das Wunderhorn wušła. Antologija „dowola dohlad do aktualneje sceny lyriki w Čěskej. Poezija tohole kraja je z njepomnjenych časow ze swětłownju za basnistwo cyłeje Europy“, we wopisowanju publikacije rěka. Předstajena bu zběrka mjez druhim we wobłuku lětušich Lipšćanskich knižnych wikow kaž tež aktualnje na knižnych wikach w Frankfurće nad Mohanom, hdźež steji Čěska jako hóstny kraj wosebje w srjedźišću. Tamnišej prezentaciji sćěhuje so turneja, kotraž wjedźe wjacore awtorki a wjacorych awtorow podłu Ryna a Mosele. Tak recitowaštaj na přikład Daria Gordová a Pavel Novotný swoju poeziju předwčerawšim w měšćanskej bibliotece w Koblenzu. Jimaj poboku běchu nimo wudawaćela zběrki Hansa Thilla Alexander Kappe a Róža Domašcyna, kotrajž přisłušataj skupinje basnicow a basnikow, zamołwjaceje přełožk originalnych twórbow. Přebasnjenja nastachu we Wuměłstwowym domje Edenkoben w Pfalcy.