Serbscy rjemjeslnicy: Ručne dźěło dale wažne

Nuknica/Dobrošicy/Wotrow. Kumštna inteligenca so dźeń a dale wuwiwa a so wosebje w strowotnistwje a financnej branši přeco bóle zasadźuje. Wona při tym pomha, dźěłowe wotběhi zjednorić, čas lutować a nadawki eficientnišo spjelnić. Tola kotre šansy skići KI a móže wona tradicionalne rjemjesło změnić? Spektrum měnjenjow wo tym je jara šěroki. Mjeztym zo někotre zawody nowe techniske móžnosće hižo čile wužiwaja, druhe wot KI ničo wědźeć nochcedźa.

Wosebje w ratarstwje njemóže kumštna inteligenca dźěło narunać. „Skót picować, pola wotžnjeć, hnój z hródźow wozyć a njeličomne druhe nadawki njehodźa so wot kompjuterow abo někajkich roboterow wukonjeć“, praji bioratar Marko Smoła z Nuknicy při telefonje.