Mišno (SN). Sakskich wobdźělnikow lětušeho Mjezynarodneho zeleneho tydźenja w Berlinje je ratarski minister swobodneho stata Thomas Schmidt (CDU) dźensa w Mišnju předstajił.

„Sakska tež lětsa zaso na zelenym tydźenju w Berlinje pokaza, kajki kulina­riski a turistiski poskitk ma“, zwurazni minister zaměr wustajerjow. Zhromadnje z wyšim měšćanostu Radeberga Bertom Wendsche, kiž je předsyda turistiskeho zwjazka Połobski kraj, předstaji wón 33 lětušich sakskich wobdźělnikow tradicionalneje přehladki ratarstwa a turizma. Nimo wulkich zežiwjenskich předewzaćow kaž Radebergskeje piwarnje abo producenta lodowych próškow Pöh­le z Budestec chcetej tež zaso Koćinski mlokowy swět a Marketingowa towaršnosć Hornja Łužica-Delnja Šleska Łužicu w zwjazkowej stolicy prezentować, zdźěla ministerstwo. Sakska so znowa wot 15. do 24. januara na wustajenišću pod škričkowanskej wěžu w Berlinje hali 21 na 1 700 kwadratnych metrach prezentuje. Kulinariske wosebitosće Łužicy budu tónkróć Kamjenske kołbaski a Połčničanske poprjancy.

Budyšin (CK/SN). We wuchodnej Sakskej su w decembrje 2015 dohromady 26 220 bjezdźěłnych registrowali, 1 197 wjace hač w předměsacu. Postup złožuje so na sezonalne přičiny. Hłownje su ludźo w tajkich branšach dźěło zbubili, kotrež wot wjedra wotwisuja kaž su to twarske a transportne přemysło abo tež ratarstwo a lěsnistwo. Přiwšěm, tak šef Budyskeje agentury za dźěło Thomas Berndt dźensa dopołdnja rozłoži, bě postup słabši hač minjene lěta. Hač do kónca 2015 jara miłeje zymy a robustnych dźěłowych wikow dla je aktualna kwota bjezdźěłnosće nimale wo procent niša hač w decembrje 2014.

Tuchwilu wučinja kwota bjezdźěłnosće za dospołny hamtski wobwod dźewjeć procentow. Cyłe lěto 2015 bě wona jednocyfrowa. Bytostne rozdźěle mjez zapadnymi a wuchodnymi kónčinami pak dale traja. Kwota chabła tuž mjez 4,8 procentami w Radebergu a 13,2 procentomaj w Zhorjelcu. Za Budyski wobłuk su 8,4 procenty, za Wojerowski 9,9 procentow a za Kamjenski 5,0 proc. podate.

Wo wulkej diskusiji před lětom, zo minimalna mzda dźěłowe městna wohroža, hižo nichtó njerěči. We wuchodnej Sakskej je ličba dźěłowych městnow z winowatostnym socialnym zawěsćenjom wot toho časa samo přiběrała.

Budyšin (CK/SN). W decembru bě w Hornjej Łužicy 26 220 žonow a muži bjez dźěła. To je 2 714 mjenje hač w samsnym času lěta 2014. Dźěłowe wiki w regionje su w robustnym stawje, rjekny šef Budyskeje dźěłoweje agentury Thomas Berndt dźensa na nowinarskej rozmołwje, jako sćahny bilancu minjeneho lěta. Tuchwilu je we wuchodnej Sakskej 3 177 swobodnych dźěłowych městnow, ni­male 700 wjace hač před lětom.

Drježdźany (SN). Wot decembra 2014 je sakske knježerstwo wjace hač 4 000 šekow za dalekubłanje wudało. Tak su 13,2 milionaj eurow hač do lěta 2020 planowanych z dohromady 71 milionow eurow z krajnych srědkow a Europskeho socialneho­ fondsa (EFS) za zawodne a indiwidualne powołanske dalekubłanje zasadźili, kaž sakske ministerstwo za hospodarstwo zdźěli. Něhdźe 2 200 mało- a srjedźostawskich předewzaćow kaž tež 2 050 jednotliwcow tak podpěruja.

Spěchowane dalekubłanje hodźi so za wšitke kwalifikaciske niwowy. Za małokwalifikowanych bjez powołanskeho wotzamknjenja přewozmu hač do 80 procentow kóštow, zo bychu dalšu kwalifikaciju pódla dźěła podpěrali.

Zajimcy móža so pod telefonowym čisłom 030/2017 90 90 nadrobniso informować. Sakska wobdźěla so na pilotowym projekće zwjazkoweho kubłanskeho ministerstwa wot spočatka lěta 2015. Na internetnej stronje www.bildungsmarkt-sachsen.de móžeš sej spěchowanje wuličić dać.