Budyšin/Choćebuz (SN). Hižo pjaty raz wotměje so lětsa łužiski klimowy a energijowy camp. Wot 5 do 9. awgusta zetkaja so w Gósćerazu (Groß Gastrose) pola Gubina škitarjo klimy z Łužicy, Berlina, Pólskeje a cyłeje Němskeje. Wjeršk campa budźe sobotu, 8. awgusta. Nimo toho je camp tež lětuši zaměr wobswětopoli­tiskeje kolesowarskeje „Tour de Natur“.

Aktiwisća campa spjećuja so planam krajneju knježerstwow Sakskeje a Br­ani­borskeje, kotrejuž politiska wola ma wjesć k rozšěrjenju wuhloweju jamow Wjelcej-juh a Wochozy II. Za škit klimy by trjeba było wudobywanje brunicy hnydom zakónčić. Klimowy camp zasadźa so najebać to za socialnje znjesliwy kónc brunicoweho hórnistwa. Prěnje kro­čele za to bychu byli, cofnyć rozšě­rjenje wuhlowych jamow. Tele žadanje chcedźa wobdźělnicy campa zwuraznić. Klimowy camp žada sej energijowu změnu na demokratiske wašnje.

Do přihotow campa přewjedu sobotu, 20. junija, protestnu akciju w Prožymje. Tam chcedźa z wobdźělnikami zestajeć wulke žołte X, znamjo spřećiwjenja přećiwo brunicy.

Hamor (SN/JaW). Gmejna Hamor chce Bjerwałdski jězor dale na maritimnu turistisku přestrjeń wutwarić. Za to je komuna njedawno dóstała přizwolenje spěchowanskich srědkow nimale 1,4 milionow eurow. To zdźěli zamołwity za turizm w Hamorskej gmejnje Roman Krautz. Pjenjezy pocha­dźeja z programa k polěpšenju regionalneje hospodarskeje struktury Swobodneho stata Sakskeje. Wo tym bu Hamorska gmejnska rada na zašłym­ pose­dźenju informowana.

Nastać maja z pomocu spěchowanja předewšěm dróhi, chódniki, schody kaž tež připrawy k zastaranju z wodu. Zdobom chcedźa pućowansku šćežku wokoło jězora wutwarić. Prěni twarski wotrězk naprawy hižo zwoprawdźeja. „Za Hamorsku gmejnu je přizwolenje srědkow wažna kročel, zo so regionalne hospdarstwo a komuna na energijowu a turistisku gmejnu wuwije“, Krautz hódnoći.

Dobruša-Huska / Mały Wjelkow / Běła Ho­ra (SN/CoR). Sakski statny minister za wobswět a ratarstwo Thomas Schmidt (CDU) je so dźensa na městnje wo stawje wjesneho wuwića w Hornjej Łužicy wobhonił. Mjez druhim wopyta minister zawod w Dobruši-Husce, hdźež plahuje Rene Löhnert wódne buwoły, a wobhlada sej zhromadnje z wjesnjanostu Michaelom Schulzu (CDU) w gmejnje wot wulkeje wody wobškodźene hrjebje a rěčki. W Małym Wjelkowje steješe žonopowy zawod Develey na programje. Přizamkny so nutrnosć při rownišću na Nuklacej hórce, hdźež wopominachu wopory składnostnje dźensnišeje róčnicy zběžka 17. junija 1953.

Wo aktualnych wužadanjach na polu wobswěta a ratarstwa chce so Thomas Schmidt wječor zjawnje ze zapósłancom krajneho sejma Markom Šimanom (CDU) w Škodźic zawodźe na Běłej Horje rozmołwjeć. Rěčeć chcedźa wo naprawach, z kotrymiž hodźi so wotchadej młodych ludźi ze wsow zadźěwać a jim zaso žiwjensku perspektiwu dać.

Budyšin (SN/at). Kak zaruču personalny přichod swojeho předewzaća? To móhło jedne prašenje być, kotrež firmownikow a zamołwitych za personalne naležnosće wabi, wobdźělić so na 15. srjedźostawskim dnju 30. junija w Budyskim Němsko-Serbskim ludowym dźiwadle. Z hesłomaj „Miks generacijow wuhotować město zarjadować“ a „Miks generacijow stanje so nawodnistwu z wužadanjom“ stej tam hłownaj přednoškaj na palace nadawki wusměrjenej. Kak generacija Y mysli a što su wužadanja na demografiju orientowacemu so personalnemu managementej, to móža wobdźělnicy wot prof. dr. Jutty Rump z Ludwigshafenskeho Instituta za dźěło a dźěłakmanosć (employability) zhonić. Prof. Rump poda dohlady do zawodneje woprawdźitosće nastupajo mjezsobnosć młódšeje, srěnjeje a staršeje generacije a z tym zwisowace konkluzije. Wulke rozdźěle wědy a nazhonjenjow mjez generacijemi a kak z nimi wobchadźeć, to tematizuje prof. dr. Bernd Okun z Lipšćanskeje akademije De Vacto.