Kubłanišća rozdźělnje postupuja, šulerjow direktnje wuwučować
Budyšin/Chrósćicy (SN/MiR). Serbske šulske kubłanišća su po zawrjenju korony dla na nowospočatk přihotowane. Wot wokomika wozjewjenja sakskeho ministerstwa za kultus, zo maja wot 18. meje zaso wšitcy šulerjo w šuli dale wuknyć, dźěłaja šulscy nawodźa a wučerjo na konceptach, kak móža wuwučować a zdobom žadane škitne naprawy wobkedźbować.
Nawodnica Ralbičanskeje zakładneje šule Andreja Liehnowa je dźensa kolegijej swoje mysle we wobłuku słužbneho zeńdźenja rozłožiła. „Šulerjo přińdu po lětnikach přez wšelake zachody do šule. Wuknyć budu woni w swojich rjadowniskich stwach, kotrež su wulke dosć.“ Starši trěbne informacije hišće dóstanu. „Situacija njebudźe za wuknjacych runjewon lochka, wosebje nic za tych mjeńšich. Wšako maja na wjele wěcow dźiwać.“
