Na zjawnym zapokazanju noweho Praskeho arcybiskopa Stanislava Přibyla je so z wjac hač wosom stow prošenymi hosćimi před tydźenjomaj tež předsyda Domowiny Dawid Statnik wobdźělił. Što je w Praze dožiwił, kotrych wažnych ludźi je zetkał a hač budźemy noweho arcybiskopa tež w Serbach witać směć, wo tym je so z nim Lukáš Novosad rozmołwjał.

Štó je Was přeprosył a su tež druzy Serbja přitomni byli?

Přeprosyło je mje Praske arcybiskopstwo. Tež wosadny farar Ralbičanskeje wosady Šćěpan Delan, kotryž je z čłonom kapitla swjateho Šćěpana w Litoměřicach, je so na Božej mši wobdźělił. Ale tež dalši znaći tam běchu, na př. generalny wikar Drježdźansko-Mišnjanskeho biskopstwa Andreas Kutschke, kotrehož Serbja tohorunja znaja.

Kak wažne je za katolskich Serbow pokročowanje poćahow mjez Łužicu a Praskim arcybiskopstwom?