Najwažniše prašenja Instituta za sorabistiku dla njewotmołwjene wostali
Lipsk (SN/MiR). Wulke wočakowanja na wčerawše informaciske zarjadowanje we a wo Instituće za sorabistiku Lipšćanskeje uniwersity su so jenož dźělnje spjelnili. Nawoda instituta prof. dr. Edward Wornar bě na diskusiju přeprosył z próstwu, so z wonkownym wobrazom instituta we wědomju serbskeje zjawnosće zaběrać. 25 zajimcow bě jeho přeprošenje sćěhowało, mjez nimi předsydka Serbskeho šulskeho towarstwa Ludmila Budarjowa, zastupnik Budyskeje wotnožki Sakskeje kubłanskeje agentury Bosćij Handrik, direktor Budyskeho Serbskeho gymnazija René Wjacławk, zamołwity za serbske naležnosće w statnym ministerstwje za wědomosć a wuměłstwo Stanisław Brězan, předsyda Domowiny Dawid Statnik, wotrjadnica Rěčneho centruma WITAJ Manuela Smolina kaž tež dr. Sonja Wölkowa a dr. Fabian Kaulfürst ze Serbskeho instituta w Budyšinje a Choćebuzu.