Kubłanišća Serbskeho šulskeho towarstwa tež lětsa zaso zapřijate

Budyšin/Zhorjelc (SN/MiR). Wo pjenjezy za projekt wojować a po tym wo jeho hódnoće so přeswědčić je so kulturnemu rumej Hornja Łužica-Delnja Šleska poradźiło. Lońši projekt, wuměłcow a chowancow dźěćacych dnjowych přebywanišćow hromadu wjesć, je tole dopokazał. Sakske statne ministerstwo za wědomosć a wuměłstwo je tuž wospjet spěchowanje přizwoliło. A znowa je kulturny rum financny partner. Hižo nětko je jasne, kelko pjenjez kóžde zarjadnišćo dóstanje – tysac eurow. „Na prěni wid zda so to wjele być, ale z pjenjezami maja so wšitke wudawki zarunać, wěcne kóšty runje tak kaž honorary za wuměłcow“, wuswětla Ulf Großmann, nawoda syće kulturne kubłanje­. „Hladaš-li na čas, kotryž wuměłcy nałoža, so ličba spěšnje relatiwizuje. Kaž nazhonjenja pokazuja, wobradźa jim projekt telko wjesela, zo často wjace časa inwestuja, hač je za to pjenjez.“