Nadawk wabjenja budźe dale ćežišćo skutkowanja SŠT
Chrósćicy (SN/MiR). Ćežišćo skutkowanja Serbskeho šulskeho towarstwa budźe dale próca wo serbskorěčny wučerski dorost. „Hač do lěta 2025 budu znajmjeńša 99 přidatnych wučerjow trěbnych, zo bychu so narunali jeničce ći, kotřiž woteńdu na wuměnk.“ Tole zwurazni předsydka SŠT Ludmila Budarjowa sobotu na hłownej zhromadźiznje towarstwa w Chróšćanskej „Jednoće“, na kotrejž so 85 čłonow wobdźěli. Zo by so tole radźiło maja so wuměnjenja spjelnić. Ludmila Budarjowa je w dźěłowej rozprawje towarstwa konkretnje pomjenowaše. Serbskim zajimcam za studij wučerstwa dyrbja samsne wuměnjenja poskićić kaž tym, kotřiž studuja sorabistiku. Numerus clausus měli w tym padźe dospołnje šmórnyć abo wo jednu cenzuru znižić. „Smy mjeztym 4. nowembra na zeńdźenju ze statnej ministerku za wědomosć a wuměłstwo dr. Evu-Mariju Stange zhonili, zo na tym dźěłaja“, zwurazni Ludmila Budarjowa. Wona žada sej dale, přewjesć intensiwne kursy serbšćiny.