Radworskej šulskej nawodnicy gmejnu wospjet narěčałoj inwestować

Radwor (SN/MiR). Wuhotowanje šulow z digitalnymi wučbnymi srědkami steji na dźěłowej agendźe zwjazkoweje ministerki za kubłanje prof. dr. Johanna Wanka (CDU). Załožba za serbski lud wuwiwanje tajkich srědkow spěchuje. „Tak chcemy projekt ,Serbšćinu online wuknyć‘ spočatk apryla zjawnje předstajić. To je poskitk předewšěm za wužiwanje při domjacym kompjuteru. Do tohole wobłuka słuša tež tuchwilu so rozšěrjacy serbski bilingualny leksikon Soblex. Dalši projekt, ,Krok po kroku‘, na kotrymž dźěła Rěčny centrum WITAJ, šulerjo a wučerjo hižo testuja. Wužiwać móža jón potom serbske a serbšćinu wuwučowace šule“, rozłožuje zamołwita załožby za nowe medije Maria Untchowa. Za wuspěšne wužiwanje tychle poskitkow je wotpowědna internetna syć trěbna. Ta pak runje na wsach často pobrachuje. „Je tuž trjeba, zo politikarjo a zastupjerjo komunow dale a wjetši ćišć na knježerstwo wukonjeja, do wutwara internetneje syće inwestować“, Untchowa wuswětla.