350 dźěći a dorosćenych wčera w „Jednoće“ swójbne popołdnjo dožiwiło

Chrósćicy (KJu/SN). Mjeztym hižo 7. raz přeprosyštaj wčera Kamjenska Domowinska župa „Michał Hórnik“ a Rěčny centrum WITAJ na tradicionalnu swójbnu schadźowanku do Chrósćic. A zaso so wopokaza, zo běchu sej organizatorojo dobry termin wupytali, přetož wjace hač 350 dźěći, staršich, dźědow a wowkow bě do wjacezaměroweje hale „Jednota“ přichwatało. Zwjeselace bě, zo njewužiwachu jeno serbske swójby z blišeje wokoliny móžnosć zetkanja. Tež z Wojerec, Slepoho a Budyšina běchu zajimcy do Chrósćic přijěli.

Serbski klankar Měrćin Krawc zahaji popołdnjo z hru „ Kral z hroznym pohladnjenjom“. Hala bě bórze derje pjelnjena a dźěći móžachu sej poskitki tam kaž tež w rumnosćach zakładneje šule lubić dać. Nowosći běštej dźěłarničce „dźiwadłowy sport a serbska hudźba“. Dźiwadłowa pedagogowka Teresa Stübnerec poskićeše staršim a dźěćom, „do wšelakich rólow zalězć“. Pola hudźbnicow Serbskeho ludoweho ansambla Jadwigi­ Simonoweje a Marlies Fryčoweje móžachu so zajimcy na wšelakich husličkach a pišćałkach wuspytać.