Wysokošulski zakoń polěpši wuměnjenja studentam wučerstwa
Drježdźany/Budyšin (SN/MiR). Zajimcy za studij wučerstwa, kotřiž serbšćinu wobknježa, změja přichodnje lěpše šansy, w předmjetach z numerusom claususom studować. Zakoń wo přizwolenju wysokošulskeho studija, kotryž je sakski parlament tónle tydźeń wobzamknył, twori za to dobry zakład. Zakoń ma wot 1. awgusta 2017 płaćić.
W paragrafje 6 je nětko jasnje zapisane, zo maja zajimcy za studij wučerstwa dopokaz pohłubšenych znajomosćow serbskeje rěče při požadanju předpołožić. Zdobom maja sakske wysoke šule a uniwersity wobkedźbować artiklej 6 a 11 wustawy, kotrejž rjadujetej prawa Serbow w swobodnym staće.
Předsyda Domowiny Dawid Statnik ma změnu zakonja za wažny krok do praweho směra. „Smy so mnohe lěta prócowali, wjace zajimcam přistup k studijej wučerstwa zmóžnić. Mam zaćišć, zo su politikarjo spóznali, zo njehodźi so potrjebje wučerjow hižo hinak wotpowědować.“ Zdobom Statnik z toho wuchadźa, „zo so najebać jednorišu imatrikulaciju na zwučenej wysokej kwaliće wukubłanja wučerjow ničo njezměni“.