Nawodnistwje Serbskeje wyšeje šule a Serbskeho gymnazija Budyšin běštej dlěšodobnje na dźeń wotewrjenych duri wabiłoj. Wutoru nětko radowachu so tam nad mnohimi zajimcami ze serbskich, serbšćinu wuwučowacych kaž tež němskich šulow.
Budyšin (SN/MiR). Hesło popołdnišeho poskitka rěkaše „Towaršnowěda“, kotrež móžachu sej wopytowarjo na šěrokej runinje zbližić. Zapřijałoj běštej kubłanišći předmjety technika, geografija, stawizny, towaršnowěda kaž tež wšelake rěče.
Na Serbskej wyšej šuli stej nawodnica Borbora Krječmarjowa a wučerka za integraciju Anja Hübner staršich informowałoj, na kotre wašnje šulerjo najlěpšu podpěru dóstawaja. „Při tym zwěsćamy, zo docpěwaja integraciscy šulerjo samsne wukony kaž wšitcy druzy“, doda Borbora Krječmarjowa. „To drje w prěnim rjedźe zadźiwa, rěči pak za wuspěch pola nas nałožowaneho wuwučowanskeho modela.“