Na Serbskim gymnaziju jich prěni raz na prěnim šulskim dnju witali
Budyšin/Chrósćicy/Pančicy-Kukow/Ralbicy/Radwor/Worklecy (aha/SN/CoR). Po žohnowanju šulskich nowačkow we Worklečanskej wjesnej kapałce witaše jich nawodnica Serbskeje zakładneje šule „Michał Hórnik“ Sabina Hejdušcyna sobotu w swjedźensce wupyšenej sportowej hali. Wona zwurazni nowačkam jadriwe słowa, kotrež w nich wjeselo na šulu a lóšt na wuknjenje bytostnje přisporjachu. W nowym 1. lětniku je 14 hólcow a wosom holcow, z kotrymiž njejsu jenož jich starši, ale tež wowki a dźědojo a dalši přiwuzni přišli, a tak bě žurla połnje wobsadźena. Rjadowniska wučerka je Borbora Bukowa. ABCnicy sćěhowachu rjany kulturny program, kotryž wuhotowachu šulerjo 2. lětnika pod nawodom Adelheid Šofcyneje a Gabriele Róbloweje. Anja Nowakowa je z dźěćimi reju nazwučowała, do kotrejež su tež nowačkow zapřijeli. Jako so jich prašachu, hač su z małej cokorowej titu na jich městnje spřihotowani, wšitcy ze sylnym hłosom za palčikami wołachu.