Paruja wuměnu nazhonjenjow z kubłarkami SŠT

štwórtk, 05. měrca 2020
artikl hódnoćić
(0 )
Docentka Budyskeje Serbskeje fachoweje šule za socialnistwo Claudia Winarjowa (stejo) w LIPJE  Foto: Alfons Handrik Docentka Budyskeje Serbskeje fachoweje šule za socialnistwo Claudia Winarjowa (stejo) w LIPJE Foto: Alfons Handrik

Smjerdźaca (aha/SN/MiR). W minjenych dźesać lětach je Smjerdźečanske swójbne a kubłanske srjedźišćo LIPA do poskitka kubłanskich a strowotnych zarjadowanjow zapřijało dalekubłanja kubłarkow a kubłarjow. Zakonsce je předpisane, zo trjebaja kubłarki, kotrež­ w dźěćacych zarjad­nišćach praktikantow přewodźeja, wotpowědnu wědu. Kwalifikacije za fachowy nawod a přewod praktikantow je LIPA tuž wob lěto dwójce poskićiła, tak zo je sej dotal něhdźe 200 kubłarkow trěbne znajomosće a kmanosće přiswojiło.

Na tuchwilnym kursu, kotryž na­wje­duje znowa docentka Budyskeje Serbskeje fachoweje šule za socialnistwo Claudia Winarjowa, wobdźěla so wot spo­čatka lěta hač dosrjedź měrca prawidłownje dwanaće kubłarkow, kotrež su z Radworja, Pančic-Kukowa, Wulkich Ždźarow, Rakec, Kulowa, Kamjenca a Wojerec. Rozdźělni nošerjo kubłanišćow maja 88hodźinske dalekubłanje za wažne a je podpěruja. Wobdźělnicy zbližeja sej prawniske předpisy, wuknu indiwidualny wukubłanski plan za praktikantow zestajeć a jich dźěło po­sudźować.

wozjewjene w: Kubłanje
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND