Přihotuja lětušich šulskich wotchadnikow nětko na pruwowanja
Budyšin/Radwor (CS/SN/MiR). Wot jutřišeho maja wotchadni šulerjo sakskich gymnazijow, wyšich a powołanskich kaž tež spěchowanskich šulow składnosć, so na swojich kubłanišćach na kónčne pruwowanja přihotować. Za to je sakske kultusowe ministerstwo wotpowědne wuměnjenja wutworiło. Tak su sej zańdźeny pjatk předewšěm šulscy nawodźa w regionalnych wotnožkach krajneho zarjada za šulu a kubłanje (LaSuB) desinfekciske a dalše škitne srědki wotewzali.
Hilža Štilerowa, nawodnica Radworskeje Serbskeje wyšeje šule „Dr. Marja Grólmusec“, ma postupowanje ministerstwa, na te wašnje šulerjow škitać, za dobre. „Tak móžemy jich nětko z direktnym wašnjom wuknjenja a wuwučowanja na pruwowanja přihotować.“ Ručež wučerjo a młodostni-šulerjo do kubłanišća přińdu, dóstanu woni wotpowědne zakryće za hubu a nós. Nawodźa šulow z toho wuchadźeja, zo wjetšina šulerjow jutře hižo z tajkim do šule přińdźe. Wšako maja mnozy šulski bus wužiwać. A tam je škit za hubu a nós předpisany.