Kultusowy minister chce ze serbskej kampanju njedostatkej wotpomhać
Budyšin (SN/bn). Wosebity bus, zapřijaty do regularneho linijoweho plana, nětko hač do dosrjedź januara 2021 po łužiskich dróhach jězdźi. Jězdźidło je ze swěćatej foliju polěpjene. Na njej wotćišćany motiw pokazuje młodeho muža, kiž pasantam kaž tež pasažěram přiwoła: „Čakamy na tebje!“ Akcija je specifisce serbski podźěl kampanje „Stać so z wučerjom w Sakskej“, z kotrejž chce statne ministerstwo za kultus nowych pedagogow do regiona přiwabić. Minjeny pjatk je nawoda zarjada, minister Christian Piwarz (CDU), bus před hłownym zachodom Serbskeho šulskeho a zetkawanskeho centruma w Budyšinje předstajił.