Budislav (RČ/SN). Čěscy přećeljo Serbow přewjedźechu prěni tydźeń awgusta w Budislavje kurs serbšćiny. Přičina, zo jón sami w Čěskej zarjadowachu, bě wotprajenje Lětnjeho kursa za serbsku rěč a kulturu Serbskeho instituta koronapandemije dla. Dokelž bě so situacija w Čěskej polěpšiła, rozmyslowachu čłonojo Towarstwa přećelow Serbow (SPL) – předewšěm jeho předsyda Lukáš Novosad –, z podpěru katedry srjedźoeuropskich studijow filozofiskeje fakulty Praskeje Karloweje uniwersity přewjesć lětnju šulu w swójskim nošerstwje. Wosebje katedra a jeje nawoda dr. Jiří Januška pomhaštaj ju financnje zawěsćić.

Dwaceći wobdźělnikow dožiwi tuž w Budislavskim kubłanskim centrumje čěskeho PEN-kluba seminar z Lukášom Novosadom a Radekom Čermákom, konwersaciju z Benom Bělkom a pozdźišo tež z čěskim wučerjom we Łužicy Janom Breindlom a Damianom Dyrlichom, kotrajž přewzaštaj popołdniši přednošk a wječorny program.