Poskitki wotwisuja wot aktualneho wuwića koronapandemije

Budyšin/Choćebuz (SN/MiR). We woběmaj Serbskimaj muzejomaj, w Budyšinje a Choćebuzu, maja hygieniski koncept. Hladajo na situaciju w Budyskim wokrjesu, w kotrymž ličby z koronawirusom natyknjenych tuchwilu stupaja, je ćežko posudźować, hač hodźa so poskitki, kotrež su za dorosćenych a dźěći w nazymskich prózdninach planowane, přewjesć. „Kak mamy postupować, wo tym rozsudźi nošer našeho muzeja, Budyski wo­krjes“, wuswětla Mónika Ošikowa, zamołwita za muzejowu pedagogiku a zjawnostne dźěło w Budyskim Serbskim muzeju, „móžemy tež sami rozsudźić, hač zarjadowanja přewjedźemy.“