Chrósćicy/Budyšin (SN/MiR). Lětuši, mjeztym 5. fachowy dźeń 2plus, je přestorčeny. Rozsud tworichu Sakske minis­terstwo za kultus a regionalna wotnožka Budyšin Krajneho zarjada za šulu a kubłanje (LaSuB), kotrejž stej ze wšeho ­spočatka nošerjej konferency w dorěčenju z kooperaciskim partnerom. Rěčnym centrumom WITAJ. Zapřijate do diskusijnych kruhow běchu mjez němskimi fachowcami tež Serbja. Konferencu chcedźa, tak dotalne planowanje, w prěnim połlěće lěta 2021 nachwatać.

„Najwjetše wobmyslenja mějachmy termina dla. Wšako chcychmy cyło­dnjowske dalekubłanje za wučerjow a wučerki pod hłownym hesłom ,Multiprofesionelne teamowe dźěło na inkluziskej šuli‘ přewjesć 7. nowembra, tydźeń po nazymskich prózdninach“, tak referent za serbske naležnosće pola LaSuB Bosćij Handrik. „Tuchwilneho wuwića a stupacych ličbow na z koronu inficěrowanych resp. schorjenych dla pak by riziko infekcije runje po tym, zo su ludźo sej swobodu pućowanja a wočerstwjenja w nazymskich prózdninach popřeli, zwyšeny był. Tuž zarjadowanje přesunjemy.“