Serbskich wuknjacych dale po rjadowniskich cyłkach wuwučuja

Radwor/Worklecy/Kulow (SN/MiR). Nawodźa sakskich šulow čakaja na rozsudy po jutřišim dorěčenju zwjazkoweje kanclerki Angele Merkel (CDU) z ministerskimi prezidentami a prezidentkami. Stupace ličby infekcijow mjez šulerjemi a wučerjemi nuzuja k rozmyslowanju. Dotalny politiski rozsud běše, zo maja šule dołhož móžno wotewrjene wostać. Po zahajenju wobmjezowanjow spočatk nowembra korony dla ma kanclerka přiwótřene naprawy za trěbne, mjez druhim winowatosć za wšitkich šulerjow, tež we wučbje škitny nahubnik wužiwać. Wona pak njezamó so spočatk zašłeho tydźenja ze swojimi namjetami přesadźić. Mjeztym su ministerscy prezidenća a ministerske prezidentki wjackróć digitalnje wo tym wuradźowali, kotre naprawy chcyli na šulach přesadźić, jeli so situacija dale přiwótři.