Njedawno su w Chróšćanskej zakładnej šuli „Jurij Chěžka“ wjelelětneho direktora kubłanišća Měrka Šmita na wuměnk rozžohnowali. Z listom, hódnoćacym předewšěm zasłužby woblubowaneho pedagogi, su so wučerki šule na našu redakciju wobroćili jón wozjewić. Tuž list tule dokumentujemy:

„Wšo ma swój čas.“ Z tutymi słowami rozžohnowa so na předposlednim šulskim dnju naš wjelelětny šulski nawoda Měrko Šmit na zasłuženy wuměnk.

Wot lěta 1992 nawjedowaše wón naše kubłanišćo tehdy hišće w jednym domje zhromadnje z něhdyšej srjedźnej šulu. Ze zaćahom do noweje zakładneje šule a z přepodaćom noweje wjacezaměroweje hale „Jednota“ 1995 skićachu so nam lěpše wuknjenske wuměnjenja. Za čiłe sportowe a kulturne žiwjenje z mnohimi njezapomnitymi wjerškami je so Měrko Šmit w pozadku njehladajo na čas angažował.