Worklecy (SN/MiR). Šulerjo dweju rjadownjow 6. lětnika Serbskeje wyšeje šule „Michał Hórnik“ Worklecy běchu wčera chětro napjeći. Wědźachu, zo maja, ně, zo chcedźa wosebity nadawk spjelnić. Su so tuž na wopyt z Ludoweho nakładnistwa Domowina wjeselili.
Lektorka Weronika Žurowa a zhotowjer Tomaš Šołta rěčeštaj ze šulerjemi wo zhromadnym projekće „Naša serbska kniha“. Ze stron kubłanišća budu jón wučerjej za serbšćinu Šćěpan Wjeńka a Katka Bukowa kaž tež wučerka za wuměłske kubłanje Claudia Čornakowa přewodźeć. „Z projektom jako LND swój wotpohlad dale wjedźemy, zwisk do šulow nawjazać a šulerjow wo nastaću serbskeje literatury informować“, zwurazni Weronika Žurowa, „zdobom chcemy jich zajimować za powołanja, kotrež móža pozdźišo w nakładnistwje wuknyć a wukonjeć. A nimo toho nam wo to dźe dźěći do pisanja tež literarnych tekstow zmužić.“ Zo by so to wšo radźiło, chcedźa šulerjo přichodne tydźenje w swojich wsach pytać za wosebitymi městnosćemi, kaž su to typiske statoki, małe a wulke haty, pomniki abo kamjenje a dalše.
