Budyšin/Chrósćicy (SN/MiR). Domowina přewjedźe tónle pjatk rěčne dalekubłanje w hornjoserbšćinje. Wone měri so na referentow a regionalne rěčnicy Domowiny. Rěčnik Domowiny Marcel Brauman zdźěli na naprašowanje SN přičinu postupowanja. „Domowina chce jako narodna organizacija kwalitu swojeje jednanskeje rěče wězo wobstajnje polěpšeć. Na dalekubłanju njeńdźe prěnjorjadnje wo prawopis a korektnu gramatiku, ale wo rjanu serbšćinu w słowjanskim duchu.“ Z teje přičiny steji w připowědźenju za zarjadowanje tež jako orientacija schodźenk C 2 po europskim referencnym ramiku. Wšitcy, kotřiž so na poskitku wobdźěla, su z Hornjeje Łužicy, to rěka, zo su faktisce maćernorěčni. Brauman wobkruća: „Wšědny dźeń w běžnym dźěle hrozy strach běrokratizacije rěče a skomolenja jeje bohatych strukturow. Wšako smy w politiskim, zarjadniskim a hospodarskim wobłuku wodnjo a w nocy z němskimi tekstami wobswěta konfrontowani. Wone wobwliwuja duch a dušu nałožowaneje serbšćiny.“ Dalekubłanje, kotrež budźe Božena Braumanowa nawjedować, wotměje so w Chrósćicach.