Někotre dźěći a młodostni z Ukrainy hižo na serbskich šulach wuknu

Budyšin/Worklecy (SN/MiR). Krok po kroku so ukrainske dźěći na serbskich šulach zaměstnjeja. Kaž Budyska wotnožka Sakskeho krajneho zarjada za šulu a kubłanje (LaSuB) zdźěli, wuknu mjeztym w cyłku dźewjeć dźěći z Ukrainy na zakładnej šuli „Dr. Marja Grólmusec“ Radwor (2) a zakładnej šuli „Michał Hórnik“ Worklecy (4) kaž tež na tamnišej wyšej šuli (3), na kotrejž přichodnje dalšich wočakuja. Na Budyskim Serbskim gymnaziju dotal ukrainskich ćěkancow njewuwučuja, byrnjež su so za wuknjenje na tymle kubłanišću wjacori, předewšěm šulerjo wyšich lětnikow zajimowali.